Gujju Bhoomi
ઉનાળાની શરૂઆત થતાં જ બજારમાં કેરીઓની રેલમરેલ જોવા મળે છે. કેરી ખાવાથી શરીરને ગરમીથી રાહત મળે છે અને તે સ્વાસ્થ્ય માટે પણ લાભદાયી છે.
ખાસ કરીને કાળઝાળ ગરમીમાં લૂથી બચવા માટે તે ખૂબ જ જરૂરી છે. જો કે, બાળકો સીધી રીતે કાચી કેરી ખાવાનું પસંદ કરતા નથી.
તો ચાલો આજે આપણે બાળકોને ભાવે એવી ચટપટી કાચી કેરી કેન્ડી રેસીપી જોઈએ, જે બાળકોને ખૂબ ગમશે.
500 ગ્રામ કાચી કેરી, 400 ગ્રામ ખડી સાકર (ખાંડ), 1 ચમચી શેકેલા જીરાનો પાવડર ,1/2 ચમચી સંચળ, સ્વાદ અનુસાર મીઠું, 1/4 ચમચી કાળા મરીનો પાવડર, ચપટી હિંગ, લીલો ફૂડ કલર (વૈકલ્પિક), બુરુ ખાંડ (કોટિંગ માટે)
સૌપ્રથમ કાચી કેરીને ધોઈ લો. ત્યારબાદ તેને ચપ્પુ વડે છોલીને તેની ગોટલી કાઢી લો. કેરીના નાના ટુકડા કરી લો અને તેને મિક્સર જારમાં નાખીને સ્મૂધ પ્યુરી બનાવી લો.
હવે એક નોન-સ્ટિક પેન લો અને તેમાં તૈયાર કરેલી કેરીની પ્યુરી નાખો. ગેસ ચાલુ કરો અને પ્યુરીને ગરમ કરો. ખાસ ધ્યાન રાખો કે પેનમાં ઘી કે તેલ નાખવાનું નથી.
જ્યારે પ્યુરી ગરમ થાય અને તેમાં પરપોટા થવા લાગે, ત્યારે તેમાં શેકેલા જીરાનો પાવડર, સંચળ, મીઠું, કાળા મરીનો પાવડર અને હિંગ ઉમેરો. બધી સામગ્રીને સારી રીતે મિક્સ કરીને પ્યુરીને પાકવા દો.
ત્યારબાદ, જો તમે ઈચ્છો તો તેમાં લીલો ફૂડ કલર ઉમેરો અને બરાબર મિક્સ કરો. હવે તેમાં ખડી સાકર ઉમેરો અને બેટરને ઘટ્ટ થવા દો. બેટરને ત્યાં સુધી પકાવો જ્યાં સુધી તે પેનને છોડવા લાગે.
જ્યારે બેટર પેન છોડવા લાગે ત્યારે ગેસ બંધ કરી દો. એક થાળી લો અને તેના પર બટર પેપર મૂકો. તૈયાર કરેલા બેટરને થાળીમાં પાથરીને સેટ થવા દો. હવે આ થાળીને બે-ત્રણ દિવસ માટે તડકામાં સૂકવવા મૂકો.
બે-ત્રણ દિવસમાં બેટરમાંથી પાણી સંપૂર્ણપણે નીકળી જશે અને તે એકદમ સુકાઈ જશે. હવે આ સૂકા બેટરને તમારી પસંદગીના આકારમાં કેન્ડીના ટુકડા કાપી લો. તમે ચોરસ, ગોળ અથવા ત્રિકોણ જેવા કોઈપણ આકારમાં કાપી શકો છો.
છેલ્લે, તૈયાર કરેલી કેન્ડીને બુરુ ખાંડમાં રગદોળી લો જેથી તેના પર ખાંડનું કોટિંગ થઈ જાય. હવે આ કેન્ડીને એર ટાઈટ કન્ટેનરમાં ભરીને સ્ટોર કરો.
તો તૈયાર છે તમારી ચટપટી ખાટી-મીઠી કાચી કેરીની કેન્ડી! આ કેન્ડી તમારા બાળકોને ખૂબ જ પસંદ આવશે અને તેઓ તેને હોંશે હોંશે ખાશે.
જો તમને આ લેખમાં આપેલી રેસીપી ગમી હોય તો તેને શેર કરો. આવી વધુ રેસીપી માટે gujjubhoomi.com વાંચતા રહો.