અંબાલાલ પટેલ | Ambalal Patel

અંબાલાલ દામોદરદાસ પટેલ, ગુજરાતના જાણીતા હવામાન નિષ્ણાત,નો જન્મ 1 સપ્ટેમ્બર, 1947ના રોજ અમદાવાદ જિલ્લાના દેત્રોજ તાલુકાના રૂડાતળ ગામે ખેડૂત પરિવારમાં થયો. ગામની શાળામાં ધોરણ 7 સુધી અભ્યાસ કર્યા બાદ, તેમણે આણંદની બી.એસ. કૉલેજ ઑફ એગ્રીકલ્ચરમાંથી બી.એસ.સી. પૂર્ણ કર્યું. 1972માં ગુજરાત સરકારની બીજ પ્રમાણન એજન્સી, અમદાવાદ ખાતે એગ્રીકલ્ચર સુપરવાઈઝર તરીકે જોડાયા અને મદદનીશ ખેતી નિયામક સુધી બઢતી મેળવી. ખેતીવાડી લેબોરેટરી, જમીન ચકાસણી અને જૈવિક નિયંત્રણ કચેરીમાં ફરજ બજાવીને તેઓ સપ્ટેમ્બર 2005માં નિવૃત્ત થયા.

ખેડૂત પુત્ર અંબાલાલભાઈએ ખેતી સાથે જ્યોતિષશાસ્ત્રમાં રુચિ દાખવી. ખેડૂતોની વરસાદની જરૂરિયાતને સમજી, તેમણે મેઘમહોદય અને વારાહી સંહિતા જેવા ગ્રંથોના અભ્યાસ દ્વારા હવામાન આગાહીનું જ્ઞાન મેળવ્યું. તેમની સચોટ આગાહીઓએ ખેડૂતોને કૃષિમાં મદદ કરી, જેનાથી તેઓ ગુજરાતમાં પ્રખ્યાત થયા.