Kankaria Balvatika Ahmedabad: કાંકરિયાની બાલવાટિકાનો ભવ્ય પુનરોદ્ધાર; ડાયનાસોર પાર્ક, ગ્લાસ ટાવર અને વેક્સ મ્યુઝિયમ સાથે 28 અવનવી રાઇડ્સનું શુક્રવારે ઉદ્ઘાટન!

અમદાવાદીઓ માટે મનોરંજનનું પ્રખ્યાત કેન્દ્ર કાંકરિયા પરિસરમાં આવેલી બાલવાટિકાનું રૂપિયા 22 કરોડના ખર્ચે રિડેવલપમેન્ટ કરવામાં આવ્યું છે.

Published By:

Gujju Bhoomi Team

Updated:

જુલાઇ 24, 2025

Kankaria Balvatika Ahmedabad Ticket Price: અમદાવાદીઓ માટે મનોરંજનનું પ્રખ્યાત કેન્દ્ર કાંકરિયા પરિસરમાં આવેલી બાલવાટિકાનું રૂપિયા 22 કરોડના ખર્ચે રિડેવલપમેન્ટ કરવામાં આવ્યું છે. આધુનિક અને અવનવી સુવિધાઓથી સજ્જ આ નવી મોડલ બાલવાટિકા ફન કાર્નિવલ બાળકોના મનોરંજન અને શૈક્ષણિક પ્રવૃત્તિઓ માટે એક નવું નજરાણું બની રહેશે. 25 જુલાઈ, શુક્રવારે સાંજે 6:30 વાગ્યે મુખ્યમંત્રી ભૂપેન્દ્ર પટેલના હસ્તે તેનું વિધિવત ઉદ્ઘાટન કરવામાં આવશે.

આકર્ષણો અને વિશેષતાઓ

નવી બાલવાટિકામાં ગુજરાત અને ભારતમાં સૌપ્રથમ વખત જોવા મળે તેવા અવનવા મ્યુઝિયમ અને રમતગમતની પ્રવૃત્તિઓનો સમાવેશ કરવામાં આવ્યો છે. અહીં કુલ 28 જેટલી અવનવી રાઇડ્સ અને એક્ટિવિટીઝ ઉપલબ્ધ હશે. મુખ્ય આકર્ષણોમાં નીચેનાનો સમાવેશ થાય છે…

હલનચલન અને અવાજ કરતા ડાયનાસોર પાર્ક
સૌથી ઊંચો ગ્લાસ ટાવર (ભારતનો પ્રથમ પારદર્શક ટાવર)
વેક્સ મ્યુઝિયમ (ગુજરાતમાં સૌપ્રથમ)
ભુલભુલૈયા
ઇલ્યુઝન હાઉસ
ગો કાર્ટ, મડ રાઇડ
વીડિયો ગો કાર્ટ
ક્રુઝ ટ્રેન
લેઝી રિવર (15 મિની બોટ)
ડ્રેગન રાઈડ
સ્નો પાર્ક (નભોદર્શન અને જેકેટ્સ સાથે)
ફ્લાઇંગ થિયેટર (AC)
આ ઉપરાંત, કોઇન હાઉસ, કાચનું ઘર (AC), શૂહાઉસ, લેન્ડસ્કેપ ગાર્ડન, સેલ્ફી ઝોન અને ગ્લો સ્ટેશન જેવી પ્રવૃત્તિઓ માટે કોઈ ચાર્જ લેવામાં આવશે નહીં.

પ્રવેશ અને રાઇડ્સની ફી

બાલવાટિકામાં નાના બાળકોથી લઈને મોટા સુધીના તમામ મુલાકાતીઓ માટે પ્રવેશ ફી 50 રૂપિયા રહેશે. જ્યારે, દરેક રાઇડ માટે અલગ-અલગ ફી નક્કી કરવામાં આવી છે. સૌથી વધુ મજા આપી શકે તેવા સ્નોપાર્ક (જેમાં નભોદર્શન અને જેકેટ્સનો સમાવેશ થાય છે) માટે 450 રૂપિયાની ફી નિર્ધારિત કરવામાં આવી છે.

રિડેવલપમેન્ટ પાછળનો હેતુ અને મંજૂરીઓ

વર્ષ 1956માં બનેલી અને હાલ કાંકરિયા ઝૂ ખાતા હસ્તક આવતી આ બાલવાટિકાનું 68 વર્ષ બાદ પીપીપી (પબ્લિક પ્રાઇવેટ પાર્ટનરશીપ) ધોરણે રિડેવલપમેન્ટ, મોડર્નાઇઝેશન અને અપગ્રેડેશન કરવાનો નિર્ણય લેવાયો હતો. સુપરસ્ટાર એમ્યુઝમેન્ટ પ્રા.લિ.ને કોન્ટ્રાક્ટ આપીને મ્યુનિસિપલ કોર્પોરેશન દ્વારા તેનું નવીનીકરણ કરવામાં આવ્યું છે.

રાજકોટ ગેમઝોન અગ્નિકાંડની ઘટના બાદ સલામતીના કડક નિયમો અને લાયસન્સ પ્રક્રિયાને કારણે બાલવાટિકાનું ઉદ્ઘાટન મોડું થઈ રહ્યું છે. જોકે, હવે તમામ જરૂરી લાયસન્સ અને મંજૂરીઓ મળી જતાં, બાલવાટિકાને જાહેર જનતા માટે ખુલ્લી મૂકવામાં આવશે.

મનપાની આવકમાં વૃદ્ધિ

પીપીપી ધોરણે શરૂ થતા આ પ્રોજેક્ટથી મ્યુનિસિપલ કોર્પોરેશનની આવકમાં પણ નોંધપાત્ર વધારો થશે. અગાઉ વાર્ષિક અંદાજિત રૂ. 10 લાખની આવક થતી હતી, તેની જગ્યાએ હવે 27 ટકા રેવન્યુ શેરિંગ દ્વારા અંદાજિત વાર્ષિક રૂ. 40 લાખની આવક થશે. તમામ પ્રકારના મેન્ટેનન્સ, લાઈટ બિલ, સિક્યોરિટી અને કર્મચારીઓના પગાર સહિતનો ખર્ચ કોન્ટ્રેક્ટર સુપરસ્ટાર એમ્યુઝમેન્ટ પ્રા.લિ. દ્વારા ઉઠાવવામાં આવશે.