Ahmedabad Kalupur Station Update: અમદાવાદના કાલુપુર રેલ્વે સ્ટેશન પાસેના એક મહત્વપૂર્ણ રસ્તા પર આગામી ત્રણ મહિના સુધી વાહન વ્યવહાર બંધ રહેશે. કેન્દ્ર સરકાર અને રેલ્વે મંત્રાલય દ્વારા કાલુપુર રેલ્વે સ્ટેશનના આધુનિકીકરણનું કામ ચાલી રહ્યું છે, જેના ભાગરૂપે આ નિર્ણય લેવામાં આવ્યો છે.
રેલ્વે સ્ટેશનની સામે પિલર નંબર P24 થી P27 વચ્ચે એલિવેટેડ રોડ બનાવવા માટે ગર્ડર લોન્ચિંગ અને અન્ય કામગીરી ક્રેન અને અન્ય મશીનો દ્વારા કરવામાં આવશે. આ કામગીરી 1 મે, 2025 થી 31 ઓગસ્ટ, 2025 સુધી એટલે કે ત્રણ મહિનાના સમયગાળા માટે 24 કલાક ચાલુ રહેશે. આને કારણે રેલ્વે સ્ટેશનની સામેનો લગભગ 40 મીટરનો રસ્તો વાહનોની અવરજવર માટે સંપૂર્ણપણે બંધ રહેશે.
કયા વૈકલ્પિક માર્ગોનો ઉપયોગ કરી શકાશે?
અમદાવાદ ટ્રાફિક પોલીસે આ અંગે એક જાહેરનામું બહાર પાડીને વૈકલ્પિક રૂટની માહિતી આપી છે. જે મુજબ:
- સાળંગપુર સર્કલ તરફથી આવતો ટ્રાફિક: આ ટ્રાફિક રેવડી બજાર થઈને સીધો બીબીસી જઈ શકશે. ત્યારબાદ બજારમાંથી પસાર થઈને રીડ હોટલથી વળાંક લઈ કાલુપુર ઇંગેટ અને કાલુપુર સર્કલ તરફ જઈ શકાશે.
- કાલુપુર સર્કલ તરફથી આવતા વાહનો: જે વાહનો કાલુપુર રેલ્વે સ્ટેશનની સામેના એક તરફી રસ્તા પર છે, તેઓ સાળંગપુર તરફ જઈ શકશે.
અમદાવાદ ટ્રાફિક પોલીસ દ્વારા જણાવવામાં આવ્યું છે કે એલિવેટેડ કોરિડોરનું કામ પૂર્ણ થયા બાદ તે રેલ્વે સ્ટેશનની સામેના રસ્તા પરથી પસાર થશે, જેના કારણે રસ્તા પર વધુ જગ્યા ઉપલબ્ધ થશે અને ટ્રાફિકનો પ્રવાહ ઝડપી બનશે. આનાથી ટ્રાફિક જામની સમસ્યામાં પણ રાહત મળશે. આ સમયગાળા દરમિયાન નાગરિકોને સહકાર આપવા અને વૈકલ્પિક રૂટનો ઉપયોગ કરવા વિનંતી કરવામાં આવી છે.
