Stock Market News Update: ભારત અને પાકિસ્તાન વચ્ચેના તણાવમાં ઘટાડો થતાં અને યુદ્ધવિરામના સમાચાર આવતા જ ભારતીય શેરબજારમાં સોમવારે અભૂતપૂર્વ તેજી જોવા મળી છે. અઠવાડિયાના પ્રથમ ટ્રેડિંગ દિવસે સેન્સેક્સ ખુલતાની સાથે જ 81,700 ની સપાટી કુદાવી ગયો, જે રોકાણકારો માટે ખુશીના સમાચાર છે.
ગયા અઠવાડિયે શુક્રવારે નોંધાયેલા ભારે ઘટાડા બાદ સોમવારે સેન્સેક્સ અને નિફ્ટીએ તોફાની શરૂઆત કરી. બોમ્બે સ્ટોક એક્સચેન્જનો 30 શેરનો સૂચકાંક સેન્સેક્સ માત્ર અડધી કલાકના ટ્રેડિંગમાં જ 2287 પોઈન્ટના જંગી ઉછાળા સાથે ટ્રેડ કરી રહ્યો હતો, જ્યારે નેશનલ સ્ટોક એક્સચેન્જનો નિફ્ટી પણ 691 પોઈન્ટના વધારા સાથે લીલા રંગમાં જોવા મળ્યો હતો.
બજાર ખુલતાની સાથે જ તેજીનું વાતાવરણ છવાઈ ગયું હતું. એશિયન બજારોમાં જોવા મળેલી પોઝિટિવ અસર ભારતીય બજાર પર સ્પષ્ટ દેખાઈ રહી હતી. બીએસઈ સેન્સેક્સે 80,803.80ના સ્તરે ટ્રેડિંગ શરૂ કર્યું, જે તેના અગાઉના બંધ 79,454.47 થી 1500 પોઈન્ટથી વધુનો વધારો સૂચવે છે. થોડી જ ક્ષણોમાં સેન્સેક્સ 1926 પોઈન્ટ વધીને 81,380 ની આસપાસ પહોંચી ગયો અને ટ્રેડિંગના પ્રથમ 30 મિનિટમાં જ આ સૂચકાંક 2.88 ટકા અથવા 2287.22 પોઈન્ટના વધારા સાથે 81,741.69 પર ટ્રેડ થવા લાગ્યો. સેન્સેક્સની સાથે સાથે એનએસઈ નિફ્ટી પણ 24,420 પર ખુલ્યો, જે તેના અગાઉના બંધ 24,008 થી ઉપર હતો અને ગણતરીની મિનિટોમાં 582.75 પોઈન્ટ વધીને 24,593.75 પર પહોંચી ગયો, જ્યારે અડધી કલાકમાં તે 2.88 ટકા અથવા 691.85 પોઈન્ટના ઉછાળા સાથે 24,699.85 ની સપાટીએ પહોંચ્યો હતો.
આ તેજીમાં એક્સિસ બેંક (4%), અદાણી પોર્ટ્સ (3.88%), બજાજ ફિનસર્વ (3.75%), એટરનલ શેર (3.61%), બજાજ ફાઇનાન્સ શેર (3.61%), NTPC શેર (3.50%), ટાટા સ્ટીલ શેર (3.40%), રિલાયન્સ શેર (3.23%), ICICI બેંક શેર (2.90%) અને HDFC બેંક શેર (2.85%) જેવા મોટા શેરોએ સૌથી વધુ તેજી દર્શાવી હતી.
મિડકેપ અને સ્મોલકેપ શેરોમાં પણ સારો ઉછાળો જોવા મળ્યો હતો. મિડકેપ ઇન્ડેક્સમાં એસ્કોર્ટ્સ (7.63%), સુઝલોન (7.32%), ફર્સ્ટ ક્રાય (7.22%), ડિક્સન ટેક (6.40%), RVNL (6.30%), IREDA (5.43%) ઊંચા દરે ટ્રેડ થઈ રહ્યા હતા. જ્યારે સ્મોલકેપ કેટેગરીમાં, પંજાબ કેમિકલ (13%) અને KPEL (10%)ના નોંધપાત્ર વધારા સાથે ટ્રેડિંગ થઈ રહ્યું હતું.
નોંધ: શેરબજારમાં રોકાણ કરતાં પહેલા હંમેશા તમારા નાણાકીય સલાહકાર અથવા બજાર નિષ્ણાતની સલાહ લો.
