8th Pay Commission: કેન્દ્ર સરકાર દ્વારા 8મા કેન્દ્રીય પગાર પંચ (CPC) ની રચનાને લીલી ઝંડી મળી ગઈ છે. આ નિર્ણયથી દેશના લગભગ 50 લાખ કેન્દ્રીય કર્મચારીઓ અને 65 લાખ પેન્શનરોના ભથ્થાંમાં મોટા ફેરફારો સાથે નોંધપાત્ર ફાયદો થવાની આશા છે. આગામી સમયમાં તેમના પગાર અને પેન્શનમાં જંગી વધારો જોવા મળી શકે છે.
8મા પગાર પંચના મુખ્ય પાસાઓ
આ 8મા પગાર પંચમાં ઘણા મહત્ત્વના મુદ્દાઓ પર ધ્યાન કેન્દ્રિત કરવામાં આવશે:
- ફિટમેન્ટ ફેક્ટર: પગાર અને પેન્શન વધારવામાં ફિટમેન્ટ ફેક્ટર મુખ્ય ભૂમિકા ભજવશે. આ ફેક્ટર કર્મચારીઓના મૂળ પગારને ગુણીને અંતિમ પગાર નક્કી કરવામાં મદદ કરે છે.
- સંદર્ભ શરતો (TOR): 8મા પગાર પંચની સંદર્ભ શરતો (Terms of Reference – TOR) ટૂંક સમયમાં નક્કી થઈ જશે. આ શરતો પંચના કાર્યક્ષેત્ર અને ભલામણો માટેની માર્ગદર્શિકા પૂરી પાડશે.
- NC-JCMનો પ્રસ્તાવ: રાષ્ટ્રીય પરિષદ સંયુક્ત સલાહકાર મિકેનિઝમ (NC-JCM) એ આ કમિશનને તેમના પ્રસ્તાવિત TOR પહેલેથી જ સુપરત કરી દીધા છે, જેમાં કર્મચારીઓના હિતમાં અનેક ભલામણોનો સમાવેશ થાય છે.
ફિટમેન્ટ ફેક્ટર: શું છે માંગણી?
તાજેતરમાં, NC JCM ના સચિવ શિવ ગોપાલ મિશ્રાએ જણાવ્યું કે, મોંઘવારીને ધ્યાનમાં રાખીને કર્મચારીઓને યોગ્ય અને પૂરતો પગાર મળવો અનિવાર્ય છે. તેમની દલીલ છે કે ફિટમેન્ટ ફેક્ટર ઓછામાં ઓછો 2.57 અથવા તેનાથી વધુ હોવો જોઈએ. હાલમાં સતત વધી રહેલા ફુગાવાને જોતા, તેમનું સ્પષ્ટ માનવું છે કે સરકારે આ ફેક્ટરને 2.57 થી ઓછો ન રાખવો જોઈએ.
NC JCM દ્વારા 2.86 ફિટમેન્ટ ફેક્ટરની માંગણી કરવામાં આવી છે. જો સરકાર આ માંગણી સ્વીકારે, તો કર્મચારીઓનો લઘુત્તમ વેતન ₹18,000 થી વધીને ₹51,480 સુધી પહોંચી શકે છે. તેવી જ રીતે, પેન્શન ₹9,000 થી વધીને ₹36,000 થઈ શકે છે, જે પેન્શનરો માટે એક મોટી રાહત સાબિત થશે.
નોકરી દરમિયાન ઓછામાં ઓછા 5 પ્રમોશનની શક્યતા!
ઝી ન્યૂઝના અહેવાલ મુજબ, મોડિફાઈડ એશ્યોર્ડ કરિયર પ્રોગ્રેશન (MACP) યોજનામાં સુધારા માટે એક મહત્ત્વનો પ્રસ્તાવ રજૂ કરવામાં આવ્યો છે. જો સરકાર આ પ્રસ્તાવને મંજૂર કરે, તો સરકારી કર્મચારીઓને તેમની નોકરી દરમિયાન ઓછામાં ઓછા 5 પ્રમોશન મળી શકે છે. આ સુધારાથી કર્મચારીઓની કારકિર્દીમાં વધુ સારી પ્રગતિ જોવા મળશે અને તેમને પ્રેરણા પણ મળશે.
