Ahmedabad News: શેલા વિસ્તારમાં આવેલી ક્લબ ઓ7માં બોપલ પોલીસે દરોડો પાડીને દારૂ પી રહેલા નવ લોકોની ધરપકડ કરી છે. પકડાયેલા લોકોમાં એક યુવતી અને આઠ યુવકોનો સમાવેશ થાય છે. પોલીસે ઘટના સ્થળેથી દારૂની બોટલો અને બે મોંઘીદાટ બીએમડબ્લ્યુ કાર સહિત કુલ 8.58 લાખ રૂપિયાનો મુદ્દામાલ જપ્ત કર્યો છે.
પોલીસને બાતમી મળી હતી કે, ક્લબ ઓ7ના ફોરમ હોલમાં મ્યુઝિકલ ડાન્સ પાર્ટી ચાલી રહી છે અને તેમાં કેટલાક લોકો દારૂ પીને આવ્યા છે. આ માહિતીના આધારે બોપલ પોલીસના પીઆઈ અને તેમની ટીમે રાત્રે સાડા બાર વાગ્યે ક્લબ પર દરોડો પાડ્યો હતો. તે સમયે હોલમાં 150થી 200 જેટલા યુવક-યુવતીઓ ડાન્સ કરી રહ્યા હતા. પોલીસે તમામની બ્રીથ એનેલાઇઝરથી તપાસ કરી હતી. આ ઉપરાંત, બેઝમેન્ટમાં પાર્ક કરેલી ગાડીઓમાં બેસીને દારૂ પી રહેલા યુવક-યુવતીઓની પણ તપાસ કરવામાં આવી હતી.
તપાસ દરમિયાન એક યુવતી અને આઠ યુવકો દારૂ પીધેલી હાલતમાં મળી આવ્યા હતા. પોલીસે તેમની ધરપકડ કરી હતી અને ઘટના સ્થળેથી દારૂની બોટલો અને ચાર કાર (જેમાં બે બીએમડબ્લ્યુનો સમાવેશ થાય છે) મળીને કુલ 8.58 લાખ રૂપિયાનો મુદ્દામાલ કબજે કર્યો હતો.
પોલીસ તપાસમાં જાણવા મળ્યું છે કે આ ડાન્સ પાર્ટીનું આયોજન હેમલ દવે નામના ઇવેન્ટ મેનેજરે કર્યું હતું અને તેણે પણ દારૂ પીધો હોવાથી પોલીસે તેની પણ ધરપકડ કરી છે.
પકડાયેલા લોકોની ઓળખ નીચે મુજબ છે:
- રાહુલ ગોસ્વામી (કંપનીમાં મેનેજર)
- હેમલ દવે (ઇવેન્ટ મેનેજર)
- એક યુવતી (કંપનીમાં લીગલ મેનેજર)
- ભાવેશ પવાર (કેમિકલ વેપારી)
- આશુતોષ શાહ (કાપડ વેપારી)
- રાહુલ ચહલ (ટ્રાવેલ્સ)
- ચિરાગ ધાનક (IT કંપની)
- સની પંડ્યા (રિઅલ એસ્ટેટ)
- પૃથ્વીરાજ ડોડલા (સીઈઓ)
પોલીસનું માનવું છે કે જો તેઓએ રાત્રે સાત વાગ્યે દરોડો પાડ્યો હોત તો વધુ લોકો દારૂ પીધેલી હાલતમાં પકડાઈ શક્યા હોત. આ ડાન્સ પાર્ટી માટે રાત્રે 12 વાગ્યા સુધીની જ મંજૂરી હતી, પરંતુ જ્યારે પોલીસે સાડા બાર વાગ્યે દરોડો પાડ્યો ત્યારે પાર્ટી હમણાં જ શરૂ થઈ હતી. પોલીસની રેડની જાણ થતાં ઘણા લોકો બહારથી જ પાછા ફરવા લાગ્યા હતા.
બોપલ પોલીસના પીઆઈ બી. ટી. ગોહિલના જણાવ્યા અનુસાર, ડાન્સ પાર્ટીના હોલ સિવાય કેટલાક યુવક-યુવતીઓ બેઝમેન્ટમાં પાર્ક કરેલી ગાડીઓમાં પણ દારૂ પી રહ્યા હતા. આ બાબત ક્લબ મેનેજમેન્ટની જાણ બહાર શક્ય ન હોવાથી મેનેજરની સંડોવણી હોવાની શક્યતા છે અને પોલીસ આ દિશામાં પણ તપાસ કરી રહી છે.
